Nunacuarni Teguscet Nut’liumallerkameggnek Qanellrit

by Charles Enoch on March 13, 2014

Johnathan Otto-q Kangirnami caliuq tegustenguluni yuinani allrakuni.  Qalarutaqamiki nunalgutni cingumalarniuq amlernun nutegmek caliaqami nutliumallerkamini.  Nunalgutain cingumaluku qanellrat tukniciquq, nunacuarnun ataciqngan teguscet nut’liumallerkait.

Qanerluni, “Wiinga nallunritlemni, nunalgutenka, tamarmeng wa pinritlilriit, cingumaluta pinglerkamtenek nutegnek.”

Malruk tegustek nunacuarni tuqucimallruuk caliamegni, mairpak Thomas Madole-aq Monukutarmiu.   Madole-aq pirraartelluku alerquurciurcet calillruut nunacuarni teguscet nut’liumallratnun caliaqameng. Piyuun qanertuq nutengvailegmeng caliameggni teguscet nut’liuryaramek elitnaurarkauniluki, ilaitni nunacuarni tegustet ak’a nutliuryaramek elitnauqallruut.

Otto-q qanertuq yuut nunacuarni elitnaurumaniluki nutegteggun pissuryaramek, yugnun cautaaresqevkenaki nutgit, mikraanratnek elitnaurumaniluteng aatameggnun nutliuryaramek.

Jacob Tupilluk Nunapicuarni tegustenguuq pingayun’legni allrakuni calillruluni.  Qanertuq umyuarniurnaqniluku-llu qayagauqatni nut’liulriamun. Cakneq alingnaqniluku cukaluni assiitmun ayagyugngacia. Qanertuq, “Amlleq cimirciquq, nallunailngurmek amlleq cimirciquq.”  Nunamini nutget yuuyaramun ilakniluki. Tegustet nut’liumallerkaat taringnaqniluku.

Qanerluni elagyami nutegtang’qelarniluku. Nutegnek-llu tugumiarluteng nunacuarni tarriitelarniluki pissuryaqatalriit. VPSO-tlu nutegnek avaling’qelangellerkaat caliameggni allanaqngaitniluku.

Otto-m umyuari ayuqenricaaqut tungiinun piyuutem, taug’aam teguscet upingallerkaatnun ayagciqngayukluku.  Qanerluni, “Cimiqanirciqlilriit wa, tegustem akngirtenritengnaqellra piqaniirciqngatuq.”

Piyuun nunacuarni tegustet nut’liumallerkaat Alaska Senate-aamtellriit caliaqeciqaat.

Previous post:

Next post: