Paacaq Kisngalria Steamboat Sloughmi Amlleret Assikenritaat

by Charles Enoch on July 17, 2014

Paacaq kisngalria Steam Bought Sloughami. Tarenraq Daysha Eaton-aamek.

Paacaq kisngalria Steam Bought Sloughami. Tarenraq Daysha Eaton-aamek.

Steamboat Sloughmi neqlillelget amlleret augaumasqaat paacaq tuani kisngamallra. Kisngallruuq pugumalluni kuiggaarem qukaani.

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.



Barbara Anvil-aam umyuara assiituq taum paacam tungiinun. Tuaggun kitulaata ayagalriit, kiagmi angyatgun, uksumillu snuukuutgun fourwheelatgunllu. Kuiggaarem qukaanu uitaan aarnaqniluku ayagalrianun. Qanerluni uksuq kina tuani picurlallruniluku. Anelgutiinun nalaqellruniluku fourwheelaq, avatii augtangqellruniluku, taumllu yua tamaanlluni. Kuigglugmiunguluni yuina pingayunlegnek cipluku allrakulek Jason fisher-aaq.

Mamterillermek utertellermini puukallruluni tuavet, nalluqallruluni. Naulluvigmillu uitallruluni iralum ataucim taktaciatun. Tamarmen yuarai augararkaullruit, ataucum taug’aam avga uitalluku.

Tauna paacaq at’lek “Shanks Ark”-amek kitellruuq 2012-aami w’all 2013-aami. Tauna Mamterillermi Kuskokwim Lighterage and Trucking-aam pikellrua. Navrarlukullu Faulker Walsh Constrictors-aam. Bethel Native Corporation-aam Ciuliqagtii Ana Hoffman-aaq nuniini paacam neqlivilek qanellruuq waten.

Alaska Department of Natural Resources-aam Faulker Walsh-amun augasqaat tauna paacaq uitamalleq allrakuq cipluku. Tarenraq Daysha Eaton-aamek.

“Tamamta wani angyalriani pengartelartukut nallukuneng nanlucia aarnaqluni, alingnaqlunillu amlleret angyat kituqetaarluteng pilaata ernerpak, unugmillu. Taunallu paacaq kisngalria tuaten wani peggluku pillratnek quyavkenata alingnaqngan. Kina akngirciiqngan cam il’iini tamaagguiquni puukaqunegteggu tauna. Augaasqumalaryaaqaput tuaten peggluku assinrilan,” qanertuq Hoffman-aaq.

Alaskamillu Senator-aaq qayagaurluki, Lisa Murkowski-mllu yuut tamaani uitalriit qalarulluki tauna pitekluku paacaq. Calivianillu tauna murilkesaaqluku, ciuliqagcetlu qalarucaaqluki, taug’aam cali caliaqeksaitaat.

Harry Faulkner-aaqlu Faulkner Walsh-amciuliqagtii qanerluni kalikat tamakut alangqaniluki. Navrallruniluku neqnek ayagacillratni. Nunamun qemagtengraatgu, elliinek atqertellruniluku, taug’aam kalikartanek paivcivkenateng nasvagilrianek ernernek navraumallratgu.

Dave Austdahl-aq qanerluni Faulkner Walsh-aq iqluniluku assirluku qillerteksaitniluku. Qanerluni ellaitnun qemagtarkaullruniluku, assirlukullu qillertarkaullruniluku. Faulkner-aankuklu Ausdahlaqlu qanerlutek niiteksaitniluku taum tuani fisher-aam picurlallra.

Tarenraq paacam nuniinek Google Earth-amek.

Tarenraq paacam nuniinek Google Earth-amek.

Anvil-aaqlu qanerluni nalluniluku kitumun augararkaucia taug’aam tangeriikan aarnariciqniluku egmian augaasqelluku. Qavcin paacat tuani uitaut Steamboat Sloughmi. Il’aitlu atuunriameng arungluteng. Faulkner Walks-aq pillerkiutainek paivcillruuq Kuiggluum nuniini kitellrem paacam augararkaanek, malruklu allak Steamboat Sloughmi. Taug’aam Shanks Ark-am augararkaanek camek qaneqsaitut.

Previous post:

Next post: